Duniya Ka Sabse Ameer Aur Sabse Tanha Aadmi
Roshaniyon se jagmagaata hua sheher, us sheher ki sabse buland imarat, aur us imarat ke aala manzil par ek shaks jis ka naam Farhan Azhar tha. Duniya usay aik kamyaab aur mashhoor business tycoon ke taur par jaanti thi, lekin asal mein woh sirf aik tanha aadmi tha. jo apne andar ke khaali pan se har roz larta tha.
Farhan ke samne ek bohot bara sheesha tha, floor to ceiling glass wall jahan se poora sheher us ke kadmon mein nazar aata tha. Lekin us ki aankhon mein na fakhar tha, na tasalli… sirf ek thaki hui khamoshi thi. Danish us ka wafadar aur samajhdar secretary, wo ahista se andar aaya.
Sir… aaj Dubai ki meeting dopahar 2 baje hai, aur Europe ke investors ne kal ka waqt confirm kar diya hai. Media team aapke interview ke liye intezaar kar rahi hai, Danish ne pur-sukoon lekin zimmedar andaaz mein kaha. Farhan ne aik gehri saans li us ki soorat par udaasi ka aik halka saya tha. Danish… us ne halki si muskurahat ke saath kaha,
Pata hai… kabhi kabhi lagta hai ke mein aik zinda aadmi nahi, sirf aik chalti hui machine ban gaya hoon. Sab kuch paas hai, lekin jo chahiye tha… woh kabhi mila hi nahi. Danish ne kuch kehne ke bajaye sirf usay dekha, us ki khamoshi hi sab kuch keh rahi thi. Tabhi… Farhan ki nazar office ki deewar par lage aik purane frame par ja padi, jismein us ke walid Azhar Sahib ki muskurati tasveer lagi hui thi.
Aur phir, aik lamha… Woh lamha, jo kabhi guzra tha wapis us ke zehan mein palat aaya۔
Aakhri Wasiat, Majboor Nikah, Aur Be-aawaz Judaai
Haveli ki hawa mein udasi ghuli hui thi. Chhat se latakti roshni ki halki si larzish, aur kamray mein bikhri dawaon ki booh, sab kuch is baat ka pata de rahi thi ke Farhan ke Dad, Azhar Sahib, ka waqt qareeb hai. Farhan ne unke paas baith kar unka haath thaama. Dad… us ki awaaz halki thi, lekin andar ek toofan tha.
Azhar Sahib ne kamzor si muskurahat ke saath kaha, Beta… mein zyada din ka mehmaan nahi hoon… sirf aik khwahish le kar jaa raha hoon, mein chahta hoon ke tum Aleena se shadi kar lo. Woh aik shareef, samajhdar larki hai… tumhare liye behtareen saathi hogi
Farhan ne aankhen jhuka lee or kuch kehna chaha, Dad…..
lekin, Unho ne us ke haath par haath rakha. Tumhari Maa aur mein tumhain sirf naam hee nahi, balkay ek aisi misaal chhor ke jaana chahte hain jo mohabbat, wafadari aur izzat se bhari ho Woh lamha… lamha nahi tha، qismat ka aik faisla tha.
Chand din baad… Ek saada magar khaas nikah tha. Na dhol, na band۔ Sirf chand log, chand duaayein، aur aik nikah-nama… jismein do zindagiyan ek nayi lakeer mein likhi ja rahi thein۔
Aleena surkh libaas mein khamosh see baithi thi, us ke chehre par na khushi thi, na gham, jaise woh kis tahammul aur samajhdaari ke saath is rishte ko qubool kar rahi ho. Qabool hai… Farhan ne woh lafz keh diye… lekin uske dil ne us waqt bhi khamoshi hi pasand ki۔
Do hafte baad…
Main nay is rishte ko sirf Dad ki wajah se manzoor kiya tha… mujhe kisi qisam ka bojh apni zindagi par nahi chahiye. Farhan ne thande, lekin theeke lehje mein kaha. Aleena ne aik lamha us ki aankhon mein dekha… Kuch kehna chaha, lekin uski zubaa ne uska saath nahi diya. Woh pal jahan mohabbat janam le sakti thi… wahan khamoshi ne raasta badal diya. Aur usi raat, Aleena ne sheher chupkay say chor diya be-awaaz, be-nishaan.
Farhan ne usay dhoondhne ki kabhi koshish nahi ki. Aur Aleena ne kabhi peeche murh kar nahi dekha
